ต้มขาไก่ซุปเปอร์

ชวนมากิน “ตีน” ครับ

ได้ยินบ่ผิดดอก บักอ้ายชวนมากิน ตีน อีหลี

แต่ว่าตีนที่หมายถึงคือ ตีนไก่

หรือที่สิเอิ้นให้มันสุภาพว่า ขาไก่ นั่นเอง

“อโรคยา ปรมาลาภา” ความบ่มีโรค เป็นลาภอันประเสริฐเด้

หายหน้าหายตาไปหลายมื้อ บักอ้ายก็บ่ได้หลายไปได๋ดอก

บ่ค่อยสบาย เจ็บกระดูกสันหลัง ช่วงนี้กะเดี๋ยวป่วยเป็นนั้นเป็นนี้

กะเลยอยากสิบอกว่าคนเฮาคันบ่เจ็บบ่ไข้นั่นแม่นดีที่สุดแล้ว

นอกจากสิเฮ็ดให้ร่างกายแข็งแรงแล้ว ยังต้องรักษาจิตใจให้แข็งแรงนำพร้อม

เกิดเป็นคนมันกะต้องมีความเหงา ความอ้างว้างตามมาเป็นของธรรมดา

ในความรู้สึกของบักอ้ายเองความเหงาบ่รุนแรงท่อความอ้างว้างเด้

ท่าเกิดความอ้างว้างขึ้นมาเหลียวไปทางได๋ กะทุกข์กะโศกไปหมดแม้

มีคนเคยบอกเอาไว้ว่า “แค่เหงากะอันตรายท่อเฮาสูบยา15มวนต่อมื้อหนึ่ง”

คันมันเป็นตาย่านขนาดนั้นกะอย่าไปเหงามันเถาะเนาะ เฮ็ดหัวใจเฮาให้มันมั่นคง

เข้มแข็ง ฮู้ให้ทันความรู้สึกเจ้าของ กะพอสิส่อยฆ่าความรู้สึกพวกนั้นไปได้คือกัน

คันใจแข็งแรงแล้ว ร่างกายกะสิได้แข็งแรงคือกัน

(บอกไผ๋น้อ บักอ้าย เว้ามาตั้งหลายตั้งหลวง ที่แท้กะกำลังบอกเจ้าของแม่นบ่)

ในตอนนี้บักอ้ายกะสินำเสนอเมนู ขาไก่ซุปเปอร์ หลายคนคงเคยได้ยินเนาะว่าขาไก่มี

คอลลาเจนหล๊ายหลาย กินแล้วสิว่าเฒ่าบ่แก่ หน้าเด้งปานเด็กน้อย อีหลีแล้วมันสิ

ขนาดได๋หรือว่าสิเป็นแค่คำส่า กะลองเบิ่งกันเอาเองโลด

ส่วนผสมและเครื่องปรุงทั้งหมด
ตีนไก่ 1 กิโลกรัม
น้ำเปล่า 3.5 ลิตร
ซีอิ๊วขาว 3 ช้อนโต๊ะ
น้ำปลา 1 ช้อนโต๊ะ
ซอสหอยนางรม 2 ช้อนโต๊ะ
ซีอิ๊วดำหวาน 1 ช้อนโต๊ะ
เกลือป่น 2 ช้อนโต๊ะ
น้ำตาลทราย 2 ช้อนโต๊ะ
น้ำบักขามเปียก 2 ช้อนโต๊ะ
น้ำมะนาว
พริกขี้หนูสวน บักอ้ายหาบ่ได้ เลยใส่พริกแดงแทน
ผักชีไทย
ชุดตำยำ ข่า ตะไคร้ ใบบักกรูด

วิธีเฮ็ดตามนี้

อย่างแรก กะมาจัดการกับตีนไก่กันก่อน ตัดเล็บมันออก

และพอตัดเรียบร้อยแล้ว ก็ให้เฮานำตีนไก่ไปล้างให้สะอาด ล้างหลายๆน้ำ

จนพวกลิ่มเลือดออกหมดเกลี้ยง กะเอาขึ้นพักเอาไว้

เอาบักนาวมาผ่า คั้นน้ำเอาไว้

ชุดตำยำล้างแล้วกะเอามาหั่นพร้อม

ระหว่างนั้นก็เอาน้ำใส่ชามใบใหญ่ แล้วเอาไปตั้งไฟ พอน้ำเดือดก็ค่อย ๆ

ใส่ตีนไก่ของเราลงไปเลย ต้มเอาไปจักครึ่งชั่วโมง

แล้วเอาตีนไก่ลงมาล้างน้ำเย็นให้สะอาดอีกเทื่อหนึ่ง ล้างแล้วกะพักเอาไว้ก่อน

ตั้งน้ำเปล่าใหม่อีกรอบ แล้วกะท่าจนน้ำเดือดคือเก่า เอาเครื่องต้มยำ

ที่เฮาเตรียมไว้ใส่ลงไปตามด้วยตีนไก่ที่เฮาต้มแล้วใส่ลงไปคือกัน

หากยังมีฟองกะตักออกให้หมด

แล้วค่อยปรุงด้วยเครื่องปรุงตามสูตรทั้งหมด แล้วต้มตีนไก่ไปเรื่อยๆ

เป็นเวลาประมาณ 1 ชม. ครับผม แล้วจั่งตักเครื่องต้มยำออกให้หมด

เฮาก็จะได้ต้มซุปเปอร์ออกมาหน้าตาประมาณในรูปด้านล่างนี้ล่ะ

และเมื่อถึงเวลาเสริฟ ... ก็ไม่มีอะไรยุ่งยากดอกค่าคุณขา

แค่เอาบักพริกมาใส่ครกตำ น้อยหลายแล้วแต่มัก ตำแล้วกะตักใส่ถ้วย

ใส่น้ำมะนาวคั้นสดๆลงไป เติมน้ำปลาอีกจักหน่อยให้มันหอม

แล้วกะค่อยตักต้มซุปเปอร์ใส่ลงในถ้วย คนพอเข้ากัน เอาผักชีโฮยหน้า